Rais
Jakaya Mrisho Kikwete akisalimiana na wafanyakazi wa Swissport katika
Uwanja wa Ndege wa Kimataifa ya Julius Nyerere wakati akielekea kwenye
ndege jioni ya jana, Jumatatu, Oktoba 28, 2013, kwenda London,
Uingereza, kwa ziara ya kikazi ya siku nne ambako atahudhuria Mkutano wa
Kimataifa wa Serikali Uwazi (Open Government) uliotishwa na Serikali ya
Waziri Mkuu wa Uingereza, Mheshimiwa David Cameroun. Kushoto kwake ni
Waziri wa Mambo ya Nje na Ushirikiano wa Kimataifa Mhe Bernard Membe na
Meneja wa Shirika la ndege la Emirates uwanjani hapo Bw. Aboubakar
Jumaa. (PICHA NA IKULU)
TAARIFA KWA VYOMBO VYA HABARIMkutano huo wa siku mbili utafanyika keshokutwa Jumatano na Alhamisi kwenye Ukumbi wa Queen Elizabeth 2 mjini London.
Miongoni mwa mambo makuu ambayo mkutano huo utazungumzia ni Serikali Uwazi na Ajenda ya Maendeleo Baada ya Mwaka 2015 wakati muongo wa utekelezaji wa Malengo ya Maendeleo ya Milenia (Millenium Development Goals) unafikia mwisho.
Masuala mengine ambayo yatazungumzwa katika mkutano ambao Rais Kikwete anaambatana na Mawaziri wake watatu ni pamoja na uwazi katika manunuzi ya umma, uwazi katika mikataba, haki ya kupata habari, uwazi katika ukaguzi wa fedha za umma, uwazi wa Serikali na vyombo vya habari, uwazi katika mikataba ya maliasili, uwazi katika maendeleo ya nchi zinazoendelea.
Mawaziri wanaoambatana na Rais Kikwete katika ziara hiyo ni Waziri wa Mambo ya Nje na Ushirikiano wa Kimataifa Mheshimiwa Bernard Membe, Waziri wa Sheria na Katiba Mheshimiwa Mathias Chikawe na Waziri wa Nchi, Ofisi ya Rais, Utawala Bora Serikali ya Mapinduzi, Zanzibar Mheshimiwa Mwinyihaji Makame.
Rais Kikwete anatarajia kurejea nyumbani Jumamosi, Novemba 2, 2013.
Imetolewa na:
Kurugenzi ya Mawasiliano ya Rais,
Ikulu.
Dar es Salaam.
29 Oktoba, 2013
